Si zot wè Pon Gédon té plat...
Samedi, 30 Mars, 2019 - 09:23
Pétet lidé-tala pa janmen fè siyak nan lespri-zot davwè Pon-tala sitelman bidjoul. Zafè i kon an dimi-won an ka fè'y sanm anpil bagay : an lakansiel, an pwel-zié, an kwasan lalin oben ankò bat-zel vitman présé an foufou (zot sav, ti zwézo-a ki ka bat zel-li pli vit ki an vantilatè).
Sa vré ki Pon Gédon bidjoul kité bidjoul ka alé.
Asiparé yo fè'y lanmanniè-tala pou sa pèmet gonmié rimonté kannal-la (éti tit-li sé "lariviè Madanm"), men lè nou ka fè tan gadé pli ba ek pli anwo, sa nou ka rimatjé ? Ki pon-an ki pli ba-a, Pon Labatwè a, plat kité plat ka alé, sitelman ki ni an lawout ka pasé anlè'y. I pa ka opozé gonmié travèsé kannal Lèvasò a ! Lè nou ka déviré tet ek nou ka gadé pli anwo, nou ka wè an lot pon ki plat tou ek ki ni an lawout anlè do'y tou. Sé pon-on ki ka mennen asou marché-a ki kolé épi Pak Floral la. Li non pli pa ka baré chimen gonmié !
Kidonk poutji sé dé pon-tala plat ek Pon Gédon won ?
Sé davwè pon-tala sé pwel-zié Foyal ! I ka fè konsidiré i ka brennen titak, i ka flitijé, adan limiè gwo lajounen-an, bagay ki ka chayé-vini an kalté dousè ki ka anni trapé pa kolé moun ki ka pasé anlè'y. Sé poutji ou pa ka maché anlè Pon Gédon kon asou nenpot ki pon. Ou ka vansé pianmpianm, ou ka sispann palé oben ri épi ou ka anni kité do won pon-an fè'y monté-désann-rimonté-ridésann jik tan ou rivé lòt bò kannal-la. Sé bagay ki ka fet adan an ti zizing tan, men sa blijé sanslé'w toubannman. Ou ka vini kon an plim ka floté, kon an rev ka fifinen nan bon mitan chalè lajounen-an.
Pon Gédon pa dot ki nanm sigré Foyal toukon La-Savann sé nanm ouvè'y...
Image:
