Kréyolad 770
Fet dé mè
Jid
Dimanch pasé sé té la fet lé manman. Mé ni moun éti konpran sé té la fet dé mè. Pas sé sa nou ni an péyi-a, dé mè asou tranndé komin.
Pa koté Mònwouj, Jèni risivrè bon kado ek anlo flè. (Man pé di zot sa pa té ka sòti Chanflò). I pa fè kon sèten madanm éti ka rifizé kado jou-tala, pas yo di sa sé makakri.
Pa koté Baspwent, Marité té bien kontan risivrè bon flè. An plis i té fini genyen éleksion mè, sa tonbé ankò pli bien ba’y. I pa fè kon yonndé manman ka vréyé pié, pas yenki kado kontel fè a ripasé, frijidè, kouto chien, aspiratè, oben dot bagay yo ka trouvé an latjuizin. Sé madanm-tala mandé bijou oben bagay pou kò-yo menm, kontel an jounen adan SPA pou masaj.
Madanm Adjilbè pa asou ni lafet dé mè, ni lafet lé manman. Pas pou’y, touléjou sé lafet lé manman. Adjiblè pak atann asou magazen pou bay lod genyen sisisila.
Chak simenn i ka genyen flè oben i ka fè an boutjé épi fèybwa alantou kay-la.
Alos annou pa bliyé lafet manman nou, mé pa lafet ni dé mè, ni démè!
Jid
Bel poveb kréyol 510
«Ou pé ni pliziè fanm, ou ni an sel manman».