Andidan

Adjilbè di kon Afarel:

—Yo ankazé.

An konpè mwen di:

—Mé non, yo klété pas yo fèmen lapot yo a laklé !

Lè man alé anlè Bondakabrit-la, man wè an mo-nef sòti déwò. Misié di nou ankalojé, pas nou lakay nou kon lapen oben poul adan kaloj.

Adan tousa zot ka di-a, mwen menm sa man ka konstaté sé ki zot tout andidan. Yo di an fransé: confiné. Man pa sav si poutoutbon zot kon Finé, tifi man Odis-la. Manzel enmen rété akay-li pas i tibren soubawou bwa mitan.

Sa té ké bel si nou tout té ka fè sa, rété andidan. Asiré sa té ké ratibwazé viryis-la ek fè’y disparet  pas i pa té ké trouvé dot moun pou i sa kontaminé.

I té ké fini anlè kò’y tou chéti, kon an ti-piébwa yo pa ka wouzé. Sa té ké bel si pa té ni moun ka pa djè enmen zafè disiplin-lan. Sa yo ka chonjé, sé yo an prèmié.

Mé sa yo pa sav, pli ta pli tris. Chonjé ti-kochon té mandé manman’y poutji djol-li long konsa. Pa bliyé sa manman-an té réponn:

—Tanto, tanto ou a wè !

Si nou pa sa rété andidan, ankazé, klété oben ankalojé, tanto tanto nou a wè’y !

Jid

Bel poveb kréyol 555

«Sé pa tou di kouri, sé savwaw séré ki konté !».

* * *

Vignette:Couvre-feu...nos manicous..., François Gabourg.