Kréyolad 820
Mas, an mas…
Jid
Magré mwa mas-la dit dépi lontan, ni anlo moun ka alé wè Athon ovantatè pou mandé’y mas. Misié ka fè yol, i pa ka fè mas.
Atjelman tout ka fè débriya épi machin-yo pou koud. Sé pa lenj yo ka fè mé mas alé-viré. Mé es sé mas-tala bon?
Asiparé komkidiré fok sa fet o nom «AFNOR». Es sé pa anlot manniè kontrolé moun?
Maskarad
Madanm Adjilbè té ja fè an tjò mas, i té konté vann yonndé pou trapé an ti-lanmonné-kod. Mé Istanislas di konsa tout moun ankazé pé pa vann mas. Es tousa pa an maskarad ?
Léta pa lé ped linò, yo trouvé anlot manniè fè lajan. Épi milion yo ponmet moun, yo bizwen lajan antré.
Épi sé jou dézankazaj-la, an sel mo ou ka tann:
«Mété mas-ou!»
Délè man ka mandé kò-mwen es sé mas-la pa ka ri tout lo makakri-tala?
Anlo moun ka alé vizité fanmiy-yo ka viv an masak, pas yo pé pa menm wè yo lopital. Ki malad, ki fanmiy ka pran doub fè.
Mas koko
Ni an konpè Adjilbè ki ni an montray asou Mas koko, misié pofité viré-mété sa déwò. Mé yo di’y i pa ka respekté distans sosial. Kivédi i ka fè moun sanblé kon adan an bal toufé yenyen. Tandik ki fok moun omwen a dé met.
Masabiel
Ni an group moun éti désidé fè an won Masabiel pour trapé an gras, pou viryis-tala pa kontinié rapé moun an fanmiy-yo ek mennen ba Bazil.
Antouléka, Adjilbè di mwen i ka espéré le 11 mé kon tè sek an tan Karenm. I paré telman, i ni wonz mas. Apré i éséyé yonn adan yo, madanm-li di’y konsa:
— Tiré mas-la an fidji’w, man pa ka rikonnet ou!
Sé ki san mas, misié té ni an fidji monstré. Ban mwen mété ta mwen pou man pa trapé pies kontravansion.
Jid
Bel poveb kréyol 560
«Fonmi chayé ravet» mé viryis-la fè tout moun doubout dwet.