Atjelman fléris ka vréyé piè pas moun pa ka achté flè ankò pou mété anlè tonb. Tout moun simié genyen flè an plastik kay chinwa-a. Asiparé sa ka alé pli vit, mé es bon maché pa ka kouté chè?

Kantapou lavé tonb, ou ni entérè fè zafè’w wou menm pas sé djòbè-a ka pété frisi mol potfèy-ou. Lè yo fè an ti-djob ba’w avan yo koumansé, yo ja ka chonjé tousa yo bizwen achté. Kidonk yo ka mandéw pri yo bizwen. Si’w pa mandé pri-a avan, ou pé trapé bon bab. Pa pran lapenn mandé yo rimatjé non Papa Doudou pas sa ké kouté’w chè. Ou sé di chandilié ka kouté pli chè ki lantèman.

Adjilbè di mwen:

— Man ka konstaté anlo jenn manmay lé adopté mes moun ayé. Sé Halloween yo lé tjanmay nou konnet, toupandan yo ka fè yo bokanté Latousen pou jou lé mò!

Sé vié-kò nou an entjet. Sa ki poko pati monté an Galilé ka mandé es yo ké vini liminé yo Latousen. Es vié zeb pé ké pousé asou lestonmak yo?

Manmay pa ped sa nou ni pou adopté sa ki sòti lotbò.

Pa tiré boyo pou mété pay!

Jid

* * *