Mèkrèdi pasé anlo moun sirtou lajénes ki enmen tuning té sanblé  pou réklamé dwa yo di ni vit fimé yo.

Anlo moun ka vréyé pié, otan ni sa ki kont, kon sa ki pou vit nwè. Sel bagay Adjilbè di mwen:

— An tout fason sa ki ni vit fimé, asiré yo dwé ni an biznes ka fet akondi kabrit mol Jan-Michel-la!

Sel bagay man pé di zot, ni an moun ki pa djè kontan sé Loyik. Loto misié sé kay-li. Misié sav ni anlo moun ki enmen makrélé zafè’y. I té fimé vit-li pas anlo moun té ka di i ka fimen. E dapré misié sa pa zafè moun, sa ka pasé an loto’y.

Adjilbè ki toujou enmen fè lafet di konsa:

— Lanné-a ka koumansé bien pas gouvelman désidé tiré moun an nwèsè yo, pou yo sa wè lalimiè!

Antouléka si ni an moun ké kontan, asiré sé Léta, pas i ké fè moun péyé 135 éro pa kontravansion. Asiré ni tibren ké péyé sé kolbògò-a ké fè bè yo. Yo ké jik fè moun ped pwen anlè permi yo.

Si ni an moun ki anrajé, ni sa ka ri plen bouden yo. Zafè vit fimé-tala ka sanm sa bien komik.

Ni an boug ki pofité di mandanm-li, i pa ka alé fè kous pas vit-li pa fimé ek solèy la tro cho. An plis di sa, klim la an pàn.

Fodra pétet mété an menm balan-an, an lwa pou sé chantè-a ki gwo lannuit, ka chanté épi an linet fimé tou.

Mé la sé anlot bagay, pas asiré zié yo pa toujou klè, sé pétet pou sa yo ka séré’y.

Jid

* * *

Bel poveb kréyol 399

«Solèy kouché, malè pa kouché».