Selman fok ni an «Test à blanc». Sa sa vé di?

Sé pa  testé pou di yo kont moun blan, monté abò bis la. Sé pa sa! Mé dapré mwen sa vé di komkidiré, fok fè sé bis la roulé pas sa ja ka fè pres dézan, premié a garé Lanmanten. Jik atjelman i fè an ti-sòti épi moun Laréjion abò, mé dépi sa motè-a pa tounen.

Savrè si sé bis la ka démaré, apré tousa tan yo estasioné. Menmsi yo kriyé yo (BHNS) yo té ké ni an wo nivo sékirité. Antouléka garanti-a pres fini, é si ni an pàn, kimoun ki reskonsab?

«Martinique Transport» poko menm sav ki mannié sa ké maché. Konmen tiké-a ké kouté? Akilè yo ké pran ek yo ké kité épi kisasayésa. Sé boug-la la CACEM, Lavil Fodfrans di yo ja paré dépi lasimenm prochenn pou fè an tes pou ayen. Mé asiparé yo ka atann la CTM pran an arété, pou yo arété fè dèyè. Es yo ké arété  fè lafet épi lé pasajé oben es yo pa espré?

Sel bagay ou pé konstaté, manniè sa pati la-a, ou sé di nou ké ni pou espéré lanné prochenn pou sé gran-bis la woulé (si yo ka démaré!).

An sel bagay, Adjilbè ki pa enmen fè lafet di mwen konsa:

— Si yo menm, ich yo, madanm yo, kotjibin yo, jénérasion yo té ka pran bis, asiré sa té ké ja réglé. Mé kom yo chak ni loto yo, yo bien sanfouté TCSP a larè oben ka maché!

Misié ka fouté fè kanmenm pas dapré mwen sa koumansé pété tet sé moun la CTM lan. Akondi poveb la «sa mel ka di an piébwa, sé pa menm bagay la i ka di atè».

Sé atjelman nou ké wè si yo lé ba moun ki pa ni loto an ti-chans vwayajé. Ann atandan, sa ki pé ba an vwazen oben vwazin pasaj, fèy. Pito zot tousel an loto zot. Asiré sa ké permet nou viré palé ek opozé ni otan anboutéyaj lématen.

Jid

* * *

Bel poveb kréyol 403

«Avan zaboka té ka bay, makak té ka nouri yich-li».