Kréyolad 723
Wawet viré bò
Jid
Dépi Lendi, moun lakot karayib-la, konnet vérité an poveb. «Lè bab kanmarad ou ka brilé, wouzé ta’w».
Eben kisiswa Chelchè, Kaz-Pilot, Belfontenn oben Kabé, yo sav lè plaj dot komin ni wawet, véyé ta yo. Wawet-la viré bò net. I pa asou lakot atlantik selman. Marigo ek Wobè ja pran asé fè konsa.
Finalman es wawet-la pa ka fè kon dé sipòtè palayi-palaya?
Yo té kou koupé pou Lalmay ki genyen dènié Koup dimond-lan. Lè yo éliminé étjip-tala, sé sipòtè silon latjé poul panché, bay asou Lafrans. Pa ni pli fransé ki yo.
Antouléka Ogisten ki pou Larjantin, mété drapo’y jik atjelman. Solèy pé chofé, lapli pé tonbé sa pé ké opozé’y mété drapo Albiceles-li douvan lapot kay-li. Sa sé an sipòtè.
Mé es sé sipòtè selman ki konsa?
Lè nou ka gadé an sé parti politik-la, ou sé di sa tibren menm bagay-la.
Sel bagay sé péchè lakot karayib-la ka mandé, sé ki kouran-an chanjé bò pou i viré chayé wawet-l a an déwò. Yo pa anvi ni ped motè yo, ni anvi ni pies vié lodè an nen yo.
Adjilbè ki té fè bel plodari pou ki komva pli bel plaj ki ni sé lakot karayib menmsi sab-la nwè. Sé jou-tala akondi anlot ti-pawol «sa mel ka di an piébwa, sé pa sa i ka di atè».
Kidonk nou adan menm bato a, si i ka pran dlo oben sargas, fok nou sa solidè.
Jid