16enm edisyon Kolok Enternasyonnal pour letid Kreol i terminen
16enm edisyon Kolok Enternasyonal pour Letid Kreol ti ofisyelman terminen yer apremidi apreen seri aktivite ki ti konprien konferans plenyer dan ki bann manm delegasyon sorti Larenyon, Gwadloup ek Lafrans parmi lezot pei ti fasilit bann prezantasyon lo bann varyasyon lalang kreol parmi bann pei kreolofonn osi byen ki bann perspektiv lo lengwistik ek dilenm aporte par en lidantite kreol modern.
Sa kolok, en levennman organize par Liniversite Sesel an kolaborasyon avek Festival Kreol ek Etudes Creoles, ti ouverDimans le 28 Oktob e ti pe deroul anba tenm ‘Monn Kreol, Lalang Kreol ek Devlopman: Defi Edikasyonnel, Kiltirel e Ekonomik.
Apre sa bann sesyon plenyer e en miting ant bann manm prezan, sa kolok ti ofisyelman ganny deklare terminen par vis-sanselye Liniversite Sesel Dokter Justin Valentin pandan en seremoni klotir kot i ti eksprim son remersiman pour tou sa ki’n ede e kontribye pour fer sa levennman en sikse.
I ti dir ki sa bann manm delegasyon in ede pour kominik en mesaz enportan pour zot lantouraz kreol e ki zot in fer en kontribisyon valab anver devlopman e anrisi lalang ek kiltir kreol.
«Mon espere ki zot pe sorti dan sa kolok avek en lespri pour al aprofondir zot resers lo lalang kreol e ki zot in apresye sa semenn aktivite ki pou ankouraz zot pour enskrir pour prosen edisyon Kolok enternasyonnal dan 2-an,» i ti dir.
Pandan sa seremoni klotir kot oditoryonm Liniversite Sesel, bann manm delegasyon ti resit bann poenm baze lo lalang ek kiltir kreol e ti osi annan sanson an kreol.
Ti osi annan en prezantasyon bann liv ki’n gany tradwir an kreol par Linyon Koz Kreol, en lorganizasyon angaze avek promosyon lalang kreol Morisyen anba Minister Lar ek Kiltir, avek Lenstiti Kreol e osi avek Dokter Valentin pour Liniversite Sesel.
Parey i tradisyon, lengwis Daniel Veronique ti prezant bann organizater lokal avek bann bouke fler e bann pti token lapresiasyon pour zot devouman ek komitman pour asire ki tou pandan sa kolok in mars byen.
Pandan son lentervansyon, Msye Veronique ti fer resorti ki i esansyel pour bann pei kreolofonn met plis lanfaz lo lalang kreol e osi son kiltir ki akonpanny li.
I ti osi sizere ki i annan plizyer opsyon pour resers ki bann manm prezan i kapab eksplore tel ki bann resers otour lalang ek kiltir kreol ant zot prop pei ek lezot pei kreolofonn tel ki bann pei dan Karaib.
Parkont, i ti note ki en lavantaz lemonn modern se ki avek globalizasyon ek mouvman dimoun, lalang kreol i prezan dan tou kwen lemonn akoz sa lalang in ganny transporte avek bann dimoun kreol ki’n al etabli aletranze.
Joelle Perreau, en partisipan lokal ki’n osi fasilit bann prezantasyon ek resers pandan sa semenn kolok, ti osi remersye tou bann organizater e ti dir ki sa levennman in en sikse e ki bann deliberasyon in enteresan.
I ti osi remersye bann delegasyon ki’n pran en semenn dan zot letan pour vin partaz zot leksperyans ek bann pwennvi akademik avek bann etidyan ek lezot Seselwa.
I ti termin son ladres par swet bann delegasyon en bonn rantre dan zot pei respektiv.
