Bagay-la ka fiolé lafet Gondo ! Wélé-wélé !
Gadé sé 2 foto-tala ki ka ilistré artik-la : tala ki agoch-la sé an latilié kawton ki an bann vakabon té séré adan "vid sanitè" Bibliyotek Inivèsitè kanpis Chelchè a ; tala ki adwet-la sé an chajman dwog ("zeb") ki an bann vakabon té konté vréyé Matinik sé jou-tala pa bato (érez-di-bonnè, sé dwanié lavil Brest la, atè an Fwans, érisi sézi sé bwet-la avan yo té batjé yo). Tout moun plis ki sav sa ki lotè vakabonnajri Bibliyotek la ek dayè, ka-yo douvan lajistis menmsi yo ka kontinié fè lestonmak pou fè pep-la kwè ki zafè-yo obidjoul. Parkont, Ladwàn ka di i poko sav kiles moun ki té lé espédié zeb-la Matinik ek i ka fè antjet pou gadé-wè es i pé mété lapat anlè yo.
Sel bagay sé ki chajman ladwog-tala, si zot wè sé vakabon-an té rivé fè'y pasé ek yo té vann li atè Matinik, i té ké rapòté yo pasé 3,5 million éwo. Zot ka bien li : twa million senk éwo. Kivédi an bidim-lajan toubannman. Kifè nou blijé pozé kò-nou yonn-dé ti keksion. Dabò-pou-yonn, kiles moun ki té ké ni lentéré fè antré tou sa zeb yon sel kou nan péyi-a ? Dépi la Fwans an plis. Asiré-pa-pétet, sé pa sé trafijan-an ki ka chayé zeb abò kannot ant Matinik ek Sent-Lisi oben Matinik ek Donmnik. Poutji sé mésié té ké vréyé ladwog-la jik an Fwans pou fè'y déviré o Zantiy ? Epi sé pa ti saché zeb non pli, men an chajman 582 tjilo kivédi apochan yon dimi-tòn.
Ladwog-tala pa dwet sòti ni o Zantiy ni tjek pa l'Anmérik. Chajman-an tou ka sanm sa ki sòti pa koté péyi Mawok (koté éti moun ka péyé adan an lanmonné yo ka kriyé "dirham") kivédi sé moun-lan ki, isiya Matinik, té pou risivwè'y la ni oblijéman liannay épi péyi-tala oben tjek lot péyi La Méditérané. Adan sé diféran péyi-tala, ni yonn yo ka kriyé Monako ek sé kawton-an éti yo té touvé andidan vid sanitè Bibliyotek Inivèsité kanpis Chelchè a, anlo adan yo sé la yo sòti. Sa matjé anlè anlo adan sé bwet-la : Principauté de Monaco.
Nou pa la pou fè travay lakolbok nan laplas-li ek nou pa ka akizé pèsonn non pli, men dapré nou, fok yo té ké chaché sav ki liannay ki sé pé ni ant sé dé afè-tala, soutou ki afè Bibliyotek la ni an patjé lajan adan'y. Asiparé Monako té mété bon lanmonné déwò pou yo té pé nimérizé archiv-li ba'y. Konsidiré atè l'Ewop pa té ké ni pèsonn ki té ké kapab fè sa !!! Ou ka fè archiv-ou janbé 7.000 tjilomet loséyan pou rivé jik Matinik aloski ou sé pé fè yo nimérizé'y toupré lakay-ou. Ni an bagay ki dwol adan sa menm !
Adan ti péyi Matinik tala koumansé ni twop afè ganstè ka woulé dépi yonn-dé tan. Ni twop ganstè an kol blan ki ka fè kok a bel poz ek ki lajistis pa ka entjété. Sitiasion-tala pé pa rété kon sa. Sa pa posib ! Fok moun pep-la koumansé mandé kont, fok asosiyasion kon déviraj lajan kréyé kò-yo pou yo pé sa goumen kont sa. Davwè si hak pa fet nan sans-tala, sé an mové lekzanp nou ka ba jennes péyi-a...
Bwet-a-mo :
Apochan : à peu près.
Bidim-lajan : fortune.
Déviraj : détournement.
Erez-di-bonnè : heureusement.
Erisi : réussir.
Fè lestonmak : se vanter.
Hak : rien.
Lakolbok : flic.
Latilié : grand nombre.
Liannay : relation.
Obidjoul : magnifique.