Yo ka konstaté lè yo lé palé lang lan, i pa djè natirel, i ka trennen kon an timanmay ki pa sa alé osi vit ki nou ka maché. Moun ka fè sa yo pé pou palé kréyol-la mé lang lan ka tjololizé kò’y jou an jou.

Adjilbè menm ki enmen fè lafet, jou 28 oktob-la, sé yenki fransé i palé. Sé té an manniè dapré’y pou pa fè makakri épi lang natirel li, pas i ka palé’y ek i koumansé aprann li’y ek matjé’y dépi yonndé tan. I poko djè fò mé i ka pogrésé pianm pianm. I pozé kò’y yonndé kèsion kontel:

— Es sé an sel jou an lanné-a kréyol bizwen yo jété zié anlè’y kon yo ka fè pou sé viékò nou an?

— Es fok pa nou dakò asou an manniè pou matjé lang lan?

— Es fok pa ni an zouti enstitisionel ki ta nou pou nou kabéché asou divini lang lan?

— Es fok pa nou sipòté tout moun ka djoubaté pou matjé lang-lan ek genyen liv sé matjè-a ka mété déwò?

— Es fok pa mété aprantisaj lang lan dépi latit jik linivèsité?

Anfen, misié pozé anlo kèsion pas i pa té ni répons, mé i té ka konstaté kréyol té malad ek té ja ka mò an bèn.
I pa té ni répons, mé i té pè kréyol fè kon adan dé péyi an karayib-la éti yo té ka sèvi kréyol touléjou. Eben Trinidad ek Lagrinad disparet té ja pran kréyol. Akondi poveb-la «lè bab kanmarad ou ka pri difé wouzé ta’w».
Es bab kréyol-la ki ja blan pé ké pri difé?

Pétet pou wouzé’y fok nou koumansé pa palé’y, respekté’y, matjé’y ek sirtou enmen’y pou i sa pli flouz ek pli obidjou!

Jid

* * *