Anlo moun té payé gwo konsa lajan, karannsenkièm prézidan Lézétazini té ké an madanm. Yo té ka di apré prèmié neg ki éli, té pou ni normalman prèmiè fanm prézidant. Mé pep Lamérik mété’y la ka ri an bèn. I mété Ilari ka ba lari chenn é manzel pé pa antré Lamézon Blanch.

Adjilbè di mwen I  tann anlo pawol kontel:

— Donal san manjé Mac Donald tronpé yo!

Misié té ka tronpété tou patou  pou di pa an anglé mé épi bel kréyol-li «lè bab kanmarad ou ka brilé, wouzé ta’w».

Lè man tann sa man mandé kò mwen:

— Es sé sa ki an bek ou ki ta’w oben sa ki an fal ou?

— Es Man Clinton pa té konté zo an tjoupoul.

Man pa lé ba pèsonn konsey, mé pengad talé jan isi pa fè kon méritjen nou ni labitid adopté mes yo. Anni gadè pantalon sé jénes nou an, sé lajol Lamérik yo adopté zafè pantalon ki swadizan pa ka pété boul.

Nou pé glisé pou alé a lekstrèm  kon majorité méritjen fè mardi oswè. Bagay ki pé fè nou ped lakat marin é mété bon lapenn an zié nou.

Adtjelman ou sé di sé lajan ka konté, dépi ou milardè ou ni tout chans ou. Pou jénes nou-an ki an lari ka ba lari chenn aléviré chario, tansion yo  pa pran an sis pou an nef. Portab yo toujou ouvè anlè lé rézo sosio é sé sa ka mennen.

Pou tousa ka di lapolitik pa ka entérésé yo, yo bien manfoupamal fok yo sav lè’w pa ka chwézi sé an chwa tou, é délè yo pé menm chwézi ba’w.

Tala ka ba’w konsèy achté chouval an bel botan, lè i ni karenm sé pa li ka rédé’w bay manjé.

Jid

* * *

Bel poveb kréyol 391

«Malédision ou ba’y belmè, sé manman’w li rivé».

Vignette: François Gabourg