Yo ka vini pòté Labib ba nou !
Dépi yonn-dé tan, Légliz katolik viré pwan titak balan adan ti péyi Matinik la aloski i té ka ayenki dédjeldésann dépi finisman 20è siek-la. Balan-tala ka vini, dabò-pou-yonn, di nominasion an jenn Monséyè matinitjé ki pa ka kalanjé pou ay toupatou, adan tout kalté model manifestasion, ki ka ba lidé'y asou tel oben tel poblenm kisasayésa... Dézienm rézon balan été Légliz katolik viré pwan an, sé zafè i ka fè vini anchay labé ki sòti ki Ayiti ki l'Afrik. Sé ki ou pa ka djè jwenn jenn Matinitjé ki lé mété an wob labé anlè yo ankò pis oben yo adan labonmbonmaten-an-midi-oswè (kannaval, konsè, midi-minui, Mercury Beach) oben yo ni an konsians idéolojik, yo li Aimé CESAIRE (Discours sur le colonialisme) ek yo sav ki Blan débatjé an Afrik épi fizi ek yo blijé Neg vini krétien. Yo chayé yo tou anlè sé bitasion kann lé Zantiy la ek yo fè menm bagay-la.
Sa nou ké palé adan artik-tala, sé yon sel sijé : zafè labé neg ki sòti andéwò, soutou Ayiti ek l'Afrik. Adan lespri anlo adan nou, Ayiti sé primié Répiblik neg lépok modèn la, sé primié péyi neg ki fouté an bidim-pouvwè blan an dal an tjou'y ek pep ayisien-an érisi akonpli tou sadavwè i té ka apiyé asou rilijion'y, rilijion'y ki sòti an Afrik, an koté yo ka kriyé : Dan Homey. Rilijion-tala sé Vodou. I ba sé goumè Tousen-Louvèti a ek sé ta Désalin la an fos lespri pou sa doubout douvan larmé Napoléyon ki, nan lépok-tala, té yonn adan sé larmé pli mapipi a ki té ni asou latè. Kifè sé Neg-la rivé genyen konba-a ek yo fè sé solda fwansé a pwan lanmè sèvi gran savann. Epi yo kréyé an péyi ki nef yo kriyé "Ayiti". Si zot wè pa té ni rilijion vodou, sa pa sèten pies ki yo té ké érisi bagay estwòdinè tala.
Kantapou l'Afrik, sé té an koté ki té ni pwop rilijion'y avan Blan té fè tan débatjé ek sé pa té ti rilijion djendjen kon dé sèten moun ka kwè, men mé sistenm bien siktiré, épi reg, épi manniè prédié, épi lapriyè espésial. Sé rilijion-tala sé Vodou men sé rilijion Yorouba a tou ki nou ka jwenn adan péyi afritjen an ki ni plis abitan-an kivédi Nijéria. Lè zot wè Blan koumansé konmes djouk la ek yo chayé Afritjen atè l'Anmérik, sé dives rilijion-tala janbé dlo tou ek yo anchouké adan dives péyi ki la Karayib (vodou ayisien, santéria atè Kiba) ki asou boul-tè méritjen an (kandonmblé atè Brézil).
Ki manniè jòdi-jou, lajounen-jòdi kon moun lontan té enmen di, sé Ayisien ek Afritjen ka vini pòté rilijion krétien an ba nou ? Sé ki sa vakabonnajri-tala ? Anlo moun adan péyi-tala "nwaris", ayen ki "Neg-Neg-Neg" yo ni nan bouch-yo, ayenki chivé "nappy" yo ka plen tet moun, ayenki "Africa-Africa"' yo konnet, men lè nou ka gadé, nou ka konstaté ki sé menm moun-tala pa ka di hak pa rapot a rilijion krétien an. Ay konpwann an bagay ! Men sa ki pi komik adan débatjé sé labé ayisien ek afritjen tala, sé ki tit ofisiel yo sé "misionnè" ! Kidonk an tanladjoukann, misionè sé té Blan ek mi anvwala jòdi-you, misionè sé Neg !
Mésié, ay fè an lous pété an nen-zot !...
Bwet-a-mo :
Anchouké : (s') enraciner.
Andéwò : l'étranger.
Bidim-pouvwè : grande puissance.
Boul-tè : continent.
Dal : défaire retentissante.
Davwè : parce que.
Dédjeldésann : dégringoler.
Djouk : esclave.
érisi : réussir.
Goumè : combattant.
Hak : rien.
Kalanjé : hésiter.
Kisasayésa : etc.
Labonm : bamboche.
Ladjoukann : esclavage.
Mapipi : puissant.
Méritjen : américain.
Tou : aussi.